工業革命後的貧富懸殊
工業革命後，人類生活質素雖然提升，不過貧富懸殊的情況比工業革命前嚴重。歷史和事實告訴我們，資本主義的意識形態就是資本家對勞動階層的剝削，從而令財富從普羅大眾聚集於社會的一小群人手上（資本家）。有些人認為勞動製造了財富，可是從宏觀角度看，人類沒有製造財富，只不過把財富重新分配 — 將來會在另一節解釋。
西貢海底
現代資本主義淡化了「剝削」一詞，潛移默化地去美化剝削。從小至大，我們被父母及師長灌輸：要成為社會的幢梁！幢梁是甚麼？林家幢？幢梁不是被壓在最底、俾其他人踩住上、俾其他人去得更遠更高的踏腳石嗎？（見上一章末段）
除了「社會的幢梁」，近年堀起另一名詞「精英」。環看多份報章廣告，那些要求低學歷、低工作經歷、依賴佣金的工作往往被稱為「精英」，例如地產公司聘請經紀，就會寫作「聘請地產精英」；金融機構的，就叫「金融界精英」或「財務精英」。
精英是 Best of the Best？
二零零四年三月二十六日
從一張保單開始看精英
二零零三年夏末，我被一名保險精英張先生看上。
晚上八時，我們相約於旺角中心地庫見面。我未有投保的意向，只懷着聽聽無妨的心情去聽聽。
張先生：「我係代表有多年信譽、竭誠為閣下服務既英國保 x 保險……」
自我介紹後，張先生從脹脹的公事包掏出一叠文件，說：「呢份係我同你度身訂造嘅 plan ，供款年期係八年，每月供一百蚊美金。係呢，你有冇帶身分証及銀行戶口號碼呢？」
「等我睇清楚份 plan 先，好冇？」我說。
「唔駛㗎啦，份 plan 係為你度身訂造，你簽咗佢就得㗎啦。」（2017 年按：原來咁講已經可以向當局告佢。）
計劃書大概節錄如下：
- 供款年期：八年
- 每月供款：一千港元
- 供至第六年可以取回已供供款（本金），沒有利息及紅利
- 供滿八年可以全數取回，另加利息及紅利，上限 HK$140,000（HK$96,000 為本金，利息及紅利為 HK$44,000 ，約 140%）
- 供款期間投保人釘蓋，人壽保險為 US$10,000（大約 HK$77,000)
「咁你都要俾時間我考慮嘛！一供就供八年，不如等我攞番去同朋友研究下先。」
「不如……不如我去行個圈，十分鐘後返嚟。十分鐘夠你考慮啦，趁呢十分鐘你俾張身分証我影印先好嗎？」
我當然拒絕：「咁唔駛嘞，我一定唔會簽住！」
「係唔係份 plan 有問題呢？」
「係，供八年對於我嚟講實在太長，而且我想知道有冇保本保證？供強積金都有保本啦。」
「黃生（即係我），你錯啦，我地英國保 x 係受英國普通法保障，一定要將 90% 收益分配俾投保人。（法律精英按：如果份保單響香港簽，就只係受香港法律保障，關英國 Q 事！）
張先生繼續游說：「你諗清楚，八年後有 140% 回報（按：回報上限，不設保本）。假如將啲錢放響銀行，一年先得 0.1 厘利率，你冇理由……」
我打斷他，說：「喂，銀行 0.1 厘係活期息率，我隨時攞得番啲錢出嚟用。你個 plan 係八年定期，你冇嘢嗎？我諗，我一定要攞份 plan 番屋企研究下先決定，謝謝你。」
第一次見面就係咁有禮貌下不歡而散。
精英的圖表
大約一星期後，電話又響起。
電話另一端傳來張先生的和藹親切、又有點毛骨悚然的聲音：「黃生呀，上次份 plan 唔啱心水呀？唔啱唔緊要，我準備咗另一份亦係為你 – 度 – 身 – 訂 – 造 – 嘅 plan，你幾時得閒，我嚟你公司附近俾你研究下，咁我地約個時間見面……」
臨放下聽筒，張先生不忘重覆：「記得帶身分証及銀行戶口號碼。」
當然，我今次不但沒有帶銀行戶口號碼，連身分證都沒有帶。
於觀塘某快餐店，擠滿了食客，只有兩個人沒有點食品，餐桌上只放了一叠文件。
我直接了當說：「我只有一小時午飯時間，唔該簡短啲。」
「得得得！」張先生揭開文件第一頁，說：「首先，我想俾個圖表你睇。」
張先生向我展示第一個圖表。
「呢個表嘅 y 軸表示責任， x 軸表示年齡。」張先生開始朗背：「你睇，你呢個年齡（紅點）要承擔嘅責任及準備承擔嘅責任係最高嘅，但相對又係最有能力去承擔保費嘅年齡。」
「但點解 x、y 軸都冇數字嘅？」
張先生不料我有此一問，頓了幾秒，連忙說：「冇錯㗎啦，嗱嗱嗱，個表係咁睇嘅……你嘅年齡大概響呢點（紅色 X）。」
「x 軸都冇數字，你點知我年紀響果點？」
張先生見勢色不對，急急翻至另一頁，是另一個圖表，得兩行：
存款利率 0.1 厘
xxx plan 147%
「呢個係銀行存款利率，你睇，只有 0.1 厘，但係我地個 plan 就有 147% ，回報高達 1470 倍！」
「咁呢個 plan 又要供幾多年？」我問。
「等等先，再睇埋呢個表。」張先生又揭至第三個圖表：「呢個表係上年度成功向我地公司索償嘅宗數及金額，從呢個表可以反映到我地嘅保障有幾全面。」
「咁索償失敗個案呢？」
「等等 ，吖，你好似玩潛水，一般保險公司都唔受保㗎喎。」
「我潛水、行山、滑浪……唔危險嘅運動都唔玩、唔落後嘅國家都唔去。」（2017 年按：之後仲有攀山及越野單車。）
「咁啱喇，如果你幫我買呢份保單，我可以叫公司 review 你嘅資料，萬一潛水有不幸，你都有錢賠。」
張先生繼續說：「不過你先俾咗身分証我影印先，再填好呢份 form ，咁我就可以叫公司 review 你嘅資料。」
說罷，張先生取出一張表格，是一張高危運動申報表。我簡單看看，就放下，張先生繼續說：「呢份 plan 嘅最大特色係保障額比較先前供八年果份更大、更全面，每月供款不變，而且有退休保障 — 保障你退休後生活。」
「咁呢個 plan 又要供幾多年？」我重覆剛才的問題。
「只係供二十九年。黃生你今年 X 歲（2017 年按：年齡當然是秘密。），供到六十歲就可以用筆錢去過退休生活。假如你供到六十歲，你可以有差不多 HK$450,000……」
計劃書大概節錄如下：
- 供款年期：二十九年
- 每月供款：一千港元
- 供至第十五年可以取回已供供款（本金），沒有利息及紅利
- 供滿二十九年可以全數取回，另加利息及紅利，上限 HK$450,000 （HK$348,000 為本金，利息及紅利為 HK$102,000，約 130% ）
- 供款期間投保人瓜直，人壽保險為 US$50,000（大約 HK$385,000)
「二十九年！供二十九年先得 130% 回報？強積金一年都唔只啦！」
「不過，到你退休就會有四十五萬，上次八年個 plan 都 offer 唔到咁大保障……」
「我供咗三十年，梗係多錢過供八年啦！仲有，你都未答我一個問題 — 130% 係上限，咁下限呢？我驚三十年後你地話蝕 Q 晒我啲錢，咁我咪連個本金都冇埋。」
「放心，我地英國保 x 保險係受英國普通法……」張先生繼續自圓其說。
我最後明確表示：「我諗我唔會考慮呢份保單。」
「 黃生，上次同今次個 plan 係我地英國保 x 保險為特別客户度身訂造，有好多客想我地 offer 呢個 plan 我地都做唔到㗎！你係十分幸運，所以不妨再考慮清楚……」
為了擺脫精英，我勉強取了那叠計劃書及經過精心統計的圖表離去，再放進街道上的垃圾筒裏。（2017 年按：那些年未有三色回收箱。）
後記
英國保 x 保險精英張先生又打俾我，又為我準備了另一份度身訂造 — 一份供款年期為五年的 plan。當然，我再沒有理會。
最後，還是要借題發揮：如果我簽了其中一份 plan，我就成為新資本主義下的一塊踏腳石（或一碌社會楝梁）。