二零零七年十月三十一日

電梯潮人

幾星期前於旺角地鐵站搭電梯從大堂往地面。同有一名老坑、一名自由行模樣的師奶，和「潮人」一名（此「潮人」與之前的潮人並非同一人）。「潮人」斜戴 trucker hat，穿人猿 t-shirt （我問過不少潮人，他們很多都不懂分辨人猿、猩猩、馬騮、猴子和狒狒）；褲，是低腰 bulky 板仔褲，另加一條鐵鍊由褲頭繞過褲檔駁入褲袋；鞋，走不出其他配搭，又是板仔鞋；臉，臉上留點鬚根，目光迷惘但反叛，本來好型，但似唔夠瞓多啲。

這一身打扮，完全係潮人 icon，係潮人嘅制服。（潮人不是要有獨特又突出的個性嗎？怎會有制服這回事？潮流雜誌不是經常用潮人必 check 、必買、必備嗎？既然是量產型，何來獨特又突出？）

「潮人」戴住 Apple iPod 原裝耳筒（我估佢袋裏面應該係 iPod 卦）– 雖然我見過有人光天化日下攞部韓國河流（…sweeter one）出品嘅 mp3 （潮音 mp 衫）充大頭鬼。（2017 年按：年青讀者，如果你唔知乜嘢係韓國河流，你一定要睇睇 Blog 與 iPod。）

老坑、師奶和我入電梯，而「潮人」就隨住音樂節奏 un 下 un 下咁 un 入電梯，好型。

自由行師奶應說：「好火吖！」

老坑用佢嘅年代嘅潮語：「好柒！」

電梯徐徐上升。「潮人」為了貫徹反叛禿廢形象，面朝電梯門，繼續 un un un 。

電梯抵達地面，門打門 — 不過是另一邊的門。

老坑、師奶和我走出電梯，而潮人就隨住音樂節奏、對住電梯門繼續 un un un ，冇出，真係好型、好火、好柒！

iPod 潮人

「iPod 潮人」乃業務上往來人士，自誇用 iPod 先夠潮。早前儲夠米買了 iPod nano，前日他無意中看見我那部第二代 iPod ，大嚷：「呢部乜嘢嚟？」

「iPod 囉，同你部一樣，不過係第二代。」我說。

「我未見過喎。」

「梗係啦，出咗好多年。當時出果陣（2003 年），香港都冇乜邊幾個人知乜嘢係 iPod。」

之後，講下講下，又講到 PDA 電話，佢又一輪咀嗡出甚麼 iPhone、Windows Mobile，貌似甚了解，但再講下講下，他未聽過 Palm 和 Windows CE。

之後，他又問 Mac 好不好用，因為他想買 — 因為用 Mac 機好潮：「響沙畢（Starbucks）見人攞住部 Mac 機上網，好型。」

「咁你去豐澤睇睇啦，佢哋做 24 個月分期。咁你想買邊部？」我說。

「iMac 嘛，蘋果唔係出 Mac 機咩？」

「你諗住攞部 iMac 去沙畢上網？」

「梗係啦，iMac 可以上 Wi-Fi 嘛？不過我個 friend 話 iMac 淨係可以無線上網，Wi-Fi 唔知唔得？我個 friend 又話 iMac 冇 IE ，咁咪即係上唔到網，所以我好唔明。」

我立刻回答「下次先傾」，匆匆離開。我期望他早日攞住部 iMac （最好係 24 吋）去沙畢上 Wi-Fi ，一定好型、好火、好柒！