神山，是馬來西亞人「一生人一定要去一次」的聖地，就像日本人對富士山的情意結（這句是同行的日本人說）。我在酒店問有關上神山資料時，酒店前台有三位職員，其中一位表示上過神山，其餘兩人立即表現十分敬重的神情。
2017 年 remaster 版本
神山易唔易行？兩三年前某電視台拍過神山特輯，內容大致是「好難行、又會有高山症」，結果「神化」了神山。如果撇開高山症 — 因高山症視乎個人體質、遺傳、上山速度等，每人情況不盡相同。以我過去經驗，大部分人只要做妥減壓，最後都會安全。撇除高山症的話，對於有行山底子的人，登上神山頭大半段不會有大問題，難度最高是最後 900 米高度（約 2.2 km 路程距離）。
開始登神山！從山腳開始……
如果有興趣睇每個標距柱，請到留意本文末段。
到達海拔 3200m 的旅館後，吃一頓豐富又美味的晚餐，然後睡覺，大約半夜二時起身，吃過宵夜，準備登神山山頂！
大約走多六百米，攀過亂石堆後，終於登上 4092.6m 山頂。而同行日本人亦響幾分鐘後抵達。
由於比預計時間快了一半，加上山頂大風又凍，離日出還有約兩個鐘，所以在山頂「例牌影相位」打卡後，就跟導遊躲進附近一個大石凹位內保暖及小睡。導遊早有準備，帶了睡袋睡覺。
不過天公不做美，當日雲層極厚，凍完一輪最後看不到日出。見勢色不對，於是趁早落山，一來太凍，二來避開繩索位「塞車」。
回到旅館，小休後吃早餐，執包袱落山……神山之旅到此匆匆完結。
神山 Q&A：
(1) 神山易唔易行？
從山腳至旅館一段一般會預六至八個鐘，所以有行山底子嘅人唔會有大問題。而且沿途有好多個休息站，只要唔急，行吓停吓影吓相睇吓風景，我沿途冇見過有人有問題。 不過，旅館後攻頂一段就需要手腳並用，而且響夜晚，就算冇高山症，都有一定難度。
(2) 神山嘅氣溫？
神山可以分三個路段：
- 海拔最低係熱帶雨林，氣溫三十幾度。
- 行到約三千米左右，就變成灌木地貌，氣溫會突然跌到十零二十度。
- 到達旅館時 9 度，山頂 1 度，如果計埋 wind chill ，大約零下三至四度。
不過，旅館有褸出租，唔駛自已揹上山。
(3) 會唔會有高山症？
我響旅館嘅高度只見到一個人有高山反應，而開始攻頂時就見到一批人有反應，不過，當我落山時就迎面遇見番佢地（正在上山），即表示只要抖一 抖，有咁慢得咁慢，最後都可以克服，而且由於神山只有四千米，唔算好高山，所以唔響山頂逗留咁耐，睇完風景就落山，一般都唔會有大問題。
而且旅館有氧氣樽賣，售價 45 馬幣，夠頂一晚，無謂慳果少少錢。
(4) 一日來回可以嗎？
唔得。據導遊講，因為山頂係一大片岩石，寸草不生，日間溫度會有四、五十度，所以只可以響晚間登頂，上面提過嘅檢查站唔會俾你通過。
(5) 某啲旅遊書講，神山旅館需要預早半年預訂？
都係據導遊講，如果得一、兩個散客，只要向當地旅行社訂 ，一般都可以攞到 Walk-in 位。
而我係上山前一晚經酒店前台預訂，第二日已經開始神山之旅。當然，假如人數多，就真係要預早訂。
(6) 登山 package 包乜嘢？
- 導遊（就算唔買 package 都規定一定要請導遊陪你行）
- 登山費、乜乜 national park 費等
- 證書費 — 假如成功登頂，會有一張彩色證書；如果登唔到頂，就有張黑白「到此一遊」證書。
- 市中心至神山來回接送
- 保險
- 旅館床位
- 五餐（見下題）
(7) 五餐食乜？
- 第一日，響山腳嘅餐廳提取餐盒，上山行程中鍾意幾時食就幾時食。
- 第一日，3200m 旅館嘅晚餐。（非常豐富自助餐）
- 第二日，凌晨攻頂前嘅宵夜。（一般豐富自助早餐）
- 第二日，凌晨攻頂後返 3200m 旅館嘅自助早餐。（同宵夜一樣）
- 第二日，落到山腳，響尋日攞餐盒嘅餐廳嘅自助午餐（一般豐富自助午餐）
上山然後下海
遊神山後，沙巴還有幾處好玩意，包括激流、看螢火蟲、當然不少得潛水。
同行日本朋友買了傻瓜機潛水殼，報稱 40 米防水，當然立刻一試，火速到附近小島潛水，證明冇入水！
神山山徑每個標距柱及沿途風景
